feature, spiritual » एउटै रुद्राक्ष बोटको बैना २५ लाख

सामान्यतया घरजग्गा किनबेचका क्रममा बैना गर्ने चलन छ । तर संखुवासभाको खाँदबारी नजिकैको एउटा गाउँमा रुद्राक्षका बोटको बैना गरिएको छ । त्यो पनि पूरै फल लाग्न नपाउँदै ।

सदरमुकाम खाँदबारी ढुंगेधाराका किसान लक्ष्मीकुमार श्रेष्ठले हुर्काएको रुद्राक्षको रुख २५ लाख रुपैयाँमा बैना गरिएको छ । व्यापारीले २५ लाखमा रुद्राक्षको बोटै किन्न खोजेपछि उनले २ लाख रुपैयाँ बैना रकम लिएका छन् । भोजपुर दिंग्लाका व्यवसायी शेरबहादुर बस्नेतले बैना गरेका हुन् ।

Rudrakhya tree

‘जेठमा व्यापारीहरू आएर यो रूखमा फलेका रुद्राक्षका दाना हाम्रो भयो, मूल्य गर्नुस् भन्न थाले,’ उनले भने, ‘त्यसपछि २ लाख बैना समातें ।’ २५ लाख मूल्य भनिए पनि दाना धेरै फल्यो भने त्यस बेलाको बजार मुल्यअनुसार रकम बढाउने सर्तमा बैना लिएको उनले बताए । फलेको दाना बस्नेतले लिनेछन् ।

तीन वर्ष अघिदेखि फल्न थालेको यो बोटको सबै रुद्राक्ष एकनाशको र बोक्रा नखोलीकनै उनले राम्रो आम्दानी गरेका छन् । ‘पोहोर यो बोटमा १ हजार ३ सय रुद्राक्षका दाना फलेका थिए,’ उनले भने, ‘त्यो बेला १२ लाखमा रूखै बेचेको थिएँ ।’ पोहोर पनि भोजपुरकै बस्नेतले उनको रूख किनेका थिए ।

कमाइ भएको पैसाले साहुको ऋण तिरेको र छोराछोरीलाई पढाउन सहज भएको उनले बताए । ‘रूद्राक्ष खेती गरेर राम्रो आम्दानी लिनका लागि एकमुखे रुद्राक्ष नै हुनुपर्छ भन्ने छैन,’ उनले भने, ‘ठूलाखालका ५ मुखे रुद्राक्ष भए पनि त्यसको मूल्य राम्रै हुन्छ ।’ गत वर्ष १३ सय दाना फलेको बोटमा यसपालि ४ हजारभन्दा बढी फल्ने अनुमान उनको छ । आजको कान्तिपुरमा खबर छ ।

0 comments

Write Down Your Responses